المستشار عثمان الكومى
المديـــــــــر العـــــــــــــام
علـــم الدولــــة : 
 | | موضوع: بريئه انا منكم 19/10/2008, 9:21 pm | |
| بريئه انا منكم يشهد عليه الليل
والتوهه والمشاوير
والقلب يوم ما اتخنق
جوه فى ضلوعى جنين
والحلم يوم ما انفرط
دمعة أهات وانين
بريئه أنا منكم
ولحد يوم الدين
بريئه م الفهلوى
واللى ما عنده ضمير
م الندل والمفترى
واللى ما يعرف دين
وبريئه م الملعون
والصاحب اللى يخون
والست لما تكون
قادره عاديك يا حفيظ
تخرب عقول وبيوت
والراجل اللى يفوت
من تحتها مهروس
وبريئه من المهووس
واللى صبح أراجوز
م البغل والمتعوس
ومساحين الاعتاب
وبريئه م الكداب
والهكص والأحزاب
واللى فتح ميت باب
للواسطه والمحاسيب
وبريئه م الهليب
واللى ما لهش حبيب
والسبع لما يخيب
يرخص ولا يسواش
وبريئه م الاوباش
والقادر الهباش
اللى واكلها بلاش
والعه ولا يهموش
وبريئه م اللى ما جوش
ساعة الندا ما بنوش
عايشين ما بينا هاموش
لابسين قناع ووشوش
وبيقتلوا الأحلام
وبريئه م الحكام
من صنف بال وسيكام
بقوا صوره بالألوان
باهته بلا برواز
وبريئه من الوسواس
والنطع والهماز
والراجل الهلاس
اللى ما عنده خشى
وبريئه م اللى اختشى
وعاش فى دور دروشه
وسمع سكوته انتشى
غايب وماله وجود
وبريئه م الهلفوت
اللى ما عادله صوت
بين الحياه والموت
عايش ومش موجود
وبريئه من بهوات
لابسين هدوم خواجات
يترقصوا بصاجات
وفشر هدى وجمالات
فى الرقص والتقصيع
وبريئه م اللى يبيع
ببلاش لندل وضيع
م الرمه والمقاطيع
اللى باعونا قطيع
واتقاسموا ف الغنمات
وبريئه م الكلابيظ
لابسين يا دوب بلابيص
يتزنقوا فى الأتوبيس
ويقولوا ياى بوليس
لو حد م المتاعيس
بقرص ذيل الفستان
وبريئه م التوهان
على كل لون يا زمان
يسقط يعيش سلطان
ويديم علينا الفول
وبريئه م المهطول
والخيخه والدلدول
والراجل الطرطور
اللى صبح مهزوز
وبريئه م المدسوس
من فرقة الهكسوس
يمسح عقول ورموز
راح جاب لنا المتعوس
رقاصة تدى دروس
ف العفة للنسوان
وبريئه م الفبركة
ووزارة التعليم
وبريئه م الهمبكه
واللى ملهش كبير
وبريئه م العولمة
وبريئه م التبوير
وبريئة من ده الزمن
خلا الخسيس له ثمن
والحر عبد ذليل
مصرية أصلى أنا
والطبع فيه أصيل
وادفع بروحى الثمن
والقى بلاد النيل
زغاريد وبدر اكتمل
طهر قلوب ملايين
ولا أقول بريئه أنا
ولا يبقى فيه جاحدين
نرعى حضاره بلد
ونعود لأصل جميل
نلقى ف نهارنا اتولد
عزم وارادة جيل
ويقول بصوته الولد
مصرى وأصلى أنا
من صلب مصريين
***
من أعمال / ايمان بكرى | |
|
