المستشار عثمان الكومى المديـــــــــر العـــــــــــــام
علـــم الدولــــة :
| موضوع: احكى يا شهرزاد 29/3/2009, 11:31 pm | |
| احكى يا شهرزاد احكى بذمة يا شهــــــــرزاد قولى الفســـــــاد هو اللى زاد
والوطن والأرض عليهم عرض بجنيه المتر وفى المزاد
وسجون ومحاكم ومداهمة والنـــــــاس بتسأل مش فاهمة
هى عصابــة وجماعة نصابــة ولا البلـــد شركة مساهمة
غلابة بتفرفـــــر مدبوحـــــة ونظام عايـــش فى البحبوحة
بيقول عملنـــــا ويا جمالنا شهادتكــــــو فيكو مجروحــــة
اسمع كلام طــــــــول السنة ما شفت غيــــــــــــر العكننة
السياســـــــــة فن الممكن مش بالنوايـــــــــــا المعلنـــــــة
حتى لو ابنـــــى وابنك جــــــاع قول الحق لو أنت شجاع
وصل صوتك لو فيها موتك مش عاوزين تسكين أوجاع
نفسى أحس إن أنا إنســـــــــان واخد حقـــــى مش إحسان
البلد كلهــــــــا فرسان ماتاخــــــــدش منهـــــــــم إلا لسان
بانحت وفى الصخر أعافـــــــر متغرب وفى بلدى مسافر
وحالى يصعب عالكــــــــــافر ولا مسامح ولا غافــــــــر
شعب لا قـــــوة ولا حولـــــه مهـــــــــزوم من أول جولة
بيلعب مع وحوش وعتاولـــــة كان نفسه يعيش جوا دولة
فيها القانـــــــــون له سيادة والفقــــــــــر مش حرب إبادة
والبلطجيـــــــــــة فوق العادة ماترحمــــــــــــونا وبزيادة
اسمع منى يا شهريــــــــــار النهب أصبــــــــــح بالمليار
والناس مسروقة قطع غيـــــار وحكومة متقلة فى العيار
اشهد يا نيل وياهــــــــرم مين افترى وميـــــــــن اتحرم
مين مطحــــــــــون واتفـــــرم وماسك نفسه ومحتـــــرم
إيمانى ببكره مالــــــه حدود ارجــع لتاريخى آباء وجدود
وكل ظالم هاياكلــــــه الدود من الآخر أنا أدهـــــا وقدود
| |
|