جاهين وبطولة جميلة وعظمة شعب مصر
قصيدة رائعة للرائع الراحل صلاح جاهين
عبرت كما لم يعبر أي جزائري عن بطولة رائدة النضال والكفاح
جميلة وهذا أكبر دليل على عظمة هذا الشعب
ويكفي أن النشيد الوطني الجزائري (مصري)
من ألحان الموسيقار خالد الذكر محمد فوزي ...
نحن أمة واحدة ويجب أن نحافظ على وحدة الصف
ويجب أن يحترم الأخ الأصغر الأخ الأكبر ولا يثير المشاكل
نشوف عمنا صلاح بيقول إيه ويا ريت تعجبكم
وتريح أعصابكم شوية ويا رب النصر لمصر
شفايفها لما تَضحك
زى شفايف ثريا
وعيونها بالحواجب
تمام شبه سنية
وشعـرها المموّج
مفروق من الشمال
على الموضة البناتى
زى عروسة كمال
وسمرا زى خضرة
ورقيقة زى سوسن
والورد فوق خدودها
صلاة النبي أحسن
والصورة بين إيدينا
مع كل حيْ حبّـَة
ياخدها يطل فيهـا
حرام يا عيني..شابة
واللي مادريش يقولك
مالها؟ جري لها إيه
ده اللي جري لجميلة
ما ينسكتش عليه
وجميلة من الجزاير
بلد البحر الكبير
بلد ولاد عمامنا
فرسان الأساطير
اللي زارعين رايتهم
ع القمة مرفرفة
اللي سايبين بيوتهم
والفرش والدفا
علشان عاوزين يعيشوا
حياة مشَّرِفة
جميلة واحدة منهم
واحدة من شعب ثاير
يتكره المظالم
وبتحب الجزاير
وبتحب الأغاني
وبتحب العماير
وبتحب الجناين
والورد والعيال
واللي جرى لجميلة
شيء من ورا الخيال
تجرى والدم نازف
وتقول يا جرح جازف
اصبر ده الوقت آزف
والناس مستنظره
أَوامر القيادة
أحبك يا جزاير
أكتر من العبادة
أَجرى كمان شوية
خطوة كمان زيادة
وف كتفها الرصاصة
وعضام اتحطمت
تنزف تنزف وتجري
لحد ما اترمت
وكلاب الصيد جابوها
ومهما يعذبوها
ومهما يصلبوها
ومهما يضربوها
ومهما إتألمت
أبداً ما سلمّت
ومهما يغصبوها
أبداً ما اتكلمت
يا حسره ع الشباب
بيت أنياب الكلاب
كتبوا العذاب عليها
بدال كتْب الكتاب
والدنيا تروح وتيجي
جُوّه عيون البنيّه
اللي ف صورتها بانت
شَبَه عيون سنيّه
وتِبْهَتْ الشفايف
الضحّاكة الشهيه
اللي ف صورتها بانت
زى شفايف ثريا
وشعرها المموّج
اللي ف صورتها سال
من فرق ع الشمال
زى عروسة كمال
معجون بدمها
حبّة عين أمها
حبّة عين النضال
واللي جرى لجميلة
ما تحمله الجبال
وتر من الكمنجة
وتر واحد وحيد
نوَّح عشان جميلة
فى أول النشيد
والأَوتار اللي باقية
صرخت من غير دموع
وامتدت م الكمنجة
لحناجر الجموع
على باب المحكمة
والعالم كله واقف
على باب المحكمة
بيغني غنيوة واحدة
راعْدة ومدمدمة
تزلزل السما
وقضاة المحكمة
العصبة المجرمة
بقلوب مطلسمة
وعلى عنيهم غما
وفى إيديهم دما
بيسمعوا الأغاني
وهمَّا فى وادى تاني
وإيش تعمل المعاني
فى عقول مضلِّمة
طول الليل السجانه
بيسنوا المقصله
وجميلةفى الزنزانة
سامعه ومستحملة
طول الليل المعارك
دايره ف حضن الجبل
وجميلة فى المهالك
عايشة على الأمل
أمل أمل أمل
أتقدم يا بطل
تبِّت فى البندقية
خلي النار تشتعل
ده اللي جرى لجميلة
مالوش غير العمل
