الانتخابات فى مصر – شعر عبدالحميد بدوي
27-11-2010
الانتخابات فى مصر
معجزة العصر وكل عصر
…كل اللى بيتكلموا
……
ويقولوا ان فية تزوير
أنا بقولهم ولا كلمة ولا حرف
أنتم الا عندكم نقص
وأنا من هنا بقول المفروض
كل بلاد الدنيا والاخرة يتعلموا
ويستفيدوا ولو لجزء بسيط
ويأخدوا ولو لنقطة من محيط
من النزاهة والشفافية
ويتعلموا شوية مننا الحرية
هما نسيوا اننا مهد الحضارات
احنا اللى بندي دروس للعالم
فى الديمقراطية
طيب أنا راضى ضميركم
شوفتوا أموات بيحضروا فى اى انتخابات
الا عندنا هو احنا فيه زينا
علشان تعرفوا أن مصر ارض المعجزات
وملتقى الحضارات وارض حبيبي وجارك
صاحب الانجازات اللى اشبه بالمعجزات
نعيش لمصر ونموت لمصر
ياريت كل واحد يخلى عند اهلة اصل
كل واحد لسانه طويل لازم يتقص
الناس دى مش عارفة قيمة مصر
شوفتوا الصناديق المتعبية
بكامل الحرية والديمقراطية
وبكل نزاهة وشفافية الا فى مصر
من قبل الانتخابات مستنية لحظة الحسم
علشان ميبقاش فيه زحمه ووش
وغير كدا الانتخابات عندنا لها شكل ولون
اصحى للون اوعى تحط فى بالك لو خدت
حتى اصوات التمانين مليون
اوعى تفكر ان الانتخابات عندنا بأصوات الناخبين
الانتخابات عندنا مش محتاجة اكتر من مكالمة تليفون
الانتخابات فى العالم بتبقى ما بين اطراف
احنا عدينا المرحلة دى خلاص
هو طرف واحد وخلاص
هو اللى على ايديه الخلاص
هما اصحاب البلد انما
احنا وجودنا ملوش اساس
الغريب الناس بتطالب بمراقبة دولية
طيب انا راضى ضميركم
هتيجى تراقب اية ولا اية
هو احنا عندنا انتخابات
احنا عندنا مسرحية
ابطالها رجال الدولة
اللى بيضحكوا علينا بالديمقراطية
احنا عايشين فى كدبة كبيرة
قال انتخابات قال
احنا عندنا اكبر عملية نصب على الشعب
احنا عندنا خيبة قوية
احنا عندنا قتل و سحل ومسجلين خطر ورشاوى
وواسطة ومحسوبية وربنا يبارك فى البلطجية
قولوا معايا ربنا يكرمة حزب الاغلبية
هو الامل فى بكرة وبعد بكرة
والسنين اللى جاية
الفين سلام وتحية
لكل البلطجية
الفين سلام تحية على الانتخابات اللى فاتت
والانتخابات اللى جاية
الشاعر
عبد الحميد بدوى
